பூனைக்கு மணி கட்டு 

பூனைக்கு மணி கட்ட 
முதலில் அதை நேசிக்க வேண்டும்
அல்லது பாவனையாவது செய்யலாம்

இப்போது அது
பிராண்டுவது சீறுவதை விட்டு
வெதுவெதுப்பான உங்கள்
மடிசுகத்திலும் கைவருடலிலும்
சொக்கி கிறங்கியிருக்கும்

மணியைக் கோர்க்க
நீங்கள் தேர்ந்தெடுக்கும் கயிறு
மஞ்சள் வண்ணத்தில் இருப்பது நலம்

மணியின் அளவை
பூனையின் கழுத்தை விட
உலோகமும்
உங்கள் வாங்கும் சக்தியும்
தீர்மானிக்கும்

மணி கட்டப் பட்டதும்
தன்  உடலை வளைத்தும் நெளிந்தும்
ஒவ்வொரு அசைவிற்கும்
ஒவ்வொரு விதமாய்
ஒலிக்கும் மணியோசையில்
மகிழ்கிறது பூனை.

-'தொடுவானமற்ற கடல்'  சக்தி அருளானந்தம்

குறிப்பு: 
இதில் பூனை என்றது பெண்ணை....  மணி என்றது  அவளின்                பொன்விலங்கை.