பறத்தல் - பறத்தல் நிமித்தம்

தான் பிடிக்கும் கரப்பானை
மசாலா கூட்டுவதுமில்லை;
வறுப்பதுமில்லை; வேக வைப்பதுமில்லை...
உடனே தின்றுவிடுவதுமில்லை புஜ்ஜி.

கவ்வலிலிருந்து விடுவிக்கும்
எதிர்பாரா சுதந்திரத்தில் திகைத்து
இலக்கின்றி ஓடும் கரப்பான்
ஓரெல்லை வரை அனுமதித்து
சட்டென்று கரப்பான் ஓட்டத்தை தன்
முன்னிரு கைகளால்
தடுத்தாட்கொள்ளும்.

உள்ளங்கையடியில் அதன் நெளிவின் குறுகுறுப்பை
ரசித்து அனுபவிக்கும்.
பெரிய மனசுக்காரிபோல் மறுபடியும் ஓட விடும்.
தட்டுத் தடுமாறி பூச்சி ஓடும்.
மறுபடி மறுபடி பிடித்தும் விட்டும் விளையாடி
அலுத்துப் போகும் போது பூச்சியின்
ஆயுள் முடியும்.