பறத்தல் - பறத்தல் நிமித்தம்

    நேற்று மாலை வெகு நேரம் கோயில் வெளி வாசலில் படுத்திருந்த ஒருவர் எழுந்து வாசலை ஒட்டியிருக்கும் கணக்காளர் இருப்பிடத்தில் நின்று துழாவியிருக்கிறார். என்ன ஏது என கணக்காளர் விசாரிக்க,”ஐயா... காலையிலயிருந்து வெளிய தாங்க படுத்து கிடந்தேன்... கொஞ்சம் போதைங்க... நிதானமில்லாம சைக்கிள் சாவிய எங்கோ விட்டுட்டேன் போலயிருக்கு.. வீட்டுக்குப் போகனுங்கய்யா... அதான்... தேடிகிட்டிருக்கேன்” என்றிருக்கிறான். வாசலில் பூட்டியபடி நிற்கும் சைக்கிளைப் பார்த்துப் பரிதாபப் பட்ட கணக்காளர், தானும் சேர்ந்து தேடி, ஒருவழியாக திருப்புளி அது இது கொண்டு திறக்க உதவியிருக்கிறார். அவருக்கு பெரிய கும்பிடாக போட்டுவிட்டுப் போனான் குடிகாரன்.

    சற்றைக்கெல்லாம் சாமிகும்பிட்டு விட்டு வெளியே வந்த மற்றொருவர் வாசலில் வந்து சுற்றுமுற்றும் பார்த்துப் பதறி, ஐயோ... இங்க நிறுத்திட்டுப் போன என் சைக்கிளைக் காணலேன்னு கூப்பாடு போட, விக்கிரகத்து மேலிருந்த எண்ணெயெல்லாம் கணக்காளர் முகத்தில்! உள்ளே வெளியேயிருந்தவங்களெல்லாம் ஒன்றுகூடிட்டாங்க. கடைசியா, தன் கையை விட்டு புது சைக்கிளுக்கு பணம் தரும்படியாகிப்போச்சு கணக்காளருக்கு...!! கலைந்து போன பக்தர் கூட்டத்துக்கு வீடு போகும் வரை குடிகாரனின் நூதன திருட்டு பற்றியும், புது சைக்கிள் வாங்கும் வரை போராடி ஜெயித்தவன் பற்றியும் தான் பேச்சு. கணக்காளர் மேலான அனுதாபம் உதட்டளவில் தான் எல்லோருக்கும். தெய்வம் நின்று கொல்லுமாம்... பேசிகிட்டாங்க. அந்த குடிகாரனை என்றைக்கு...?