பறத்தல் - பறத்தல் நிமித்தம்

காட்டித் தொலைக்கிறாய்; கழுதையே! சனியனே!
அப்பன் முருகனை அல்லவா அழைத்தேன்!
உன்னையா அழைத்தேன், உதவாக் கரையே!”
என்றார். சென்றான் ஏவ லாளன்

தலைவா ழைஇலை தன்னில் பரப்பிய
பலவிதக் காய்கறிப் படைய லோடு
நெல்லூர் அரிசிச் சோற்றில், நல்லூர்
நெய்யை ஊற்றிக் கையால் பிசைந்தே
உண்டெழுந் தருளி உதரம் தடவி
எண்ணிக்கை யற்ற ஏப்பம் இசைத்தே
ஓய்வு காண உல்லாச மாகச்
சாய்வுநாற் காலியில் திருமேனி சாய்க்கையில்
முத்தையா பிள்ளை “முருகா!” என்றார்.
உடனே அவர்முன் ஓடோடி வந்து
“என்ன எசமான் கூப்பிட் டீர்களா?”
என்று கேட்டான் ஏவ லாளன்;
முத்தையா பிள்ளையின் முகமோ எரிந்தது!

“அழுகை மூஞ்சிப் பயலே! நல்ல
நாளும் பொழுதுமாய் நாயே, என்முன்
பட்டினி படர்ந்தஉன் முகத்தை ஏனடா
காட்டித் தொலைக்கிறாய்? கழுதையே! சனியனே!
அப்பன் முருகனை அல்லவா அழைத்தேன்!
உன்னையா அழைத்தேன், உதவாக் கரையே?”
என்றார். சென்றான் ஏவ லாளன்.

உச்சி இரவு; ஒருமணி இருக்கும்.
“முருகா! முருகா! முருகா!” என்று
பிள்ளைவாள் மாடியில் பெருங்குரல் எழுப்பினார்.
கொல்லையில் அந்தக் குரல்எதி ரொலிக்கவே
ஏவ லாளன் எழுந்தான்; பின்னர்
‘என்னையா கூப்பிட்டார்; இருக்கா(து)' என்றவன்
உள்ளே போகாமல் உடம்பைச் சாய்த்தான்!

கொஞ்சநே ரத்தில் கோபத் தோடு
மடமட வென்றே மாடியை விட்டுப்
பிள்ளைவாள் வந்தார் கொல்லையை நோக்கி!
இனிதாய்த் தூங்கிய ஏவ லாளனைத்
தட்டி எழுப்பினார்; திட்டி எழுப்பினார்!
“ஏனடா பேயனே! இளிச்ச வாயனே!
திருட்டுப் பயல்கள் செல்வத்தை எல்லாம்
சுருட்டிக் கொண்டு போகையில் உன்னைக்
கூப்பிட் டேனே! குரல்கொடுத் தேனே!
ஓடிவந் தாயா ஓசையைக் கேட்டு?
தின்று கொழுத்துத் தினமும் தூங்கவா
தண்டச் சோறு? தடியனே!” என்றார்
முத்தையா பிள்ளை. “ஐயையோ! நமது
சொத்தையா திருடர் சூறை யாடினார்?
எசமான்! தாங்கள் முருகா என்றது
காதில் விழுந்தது கணீரென! நான்எழுந்(து)
ஓடி வரத்தான் எண்ணினேன்; ஆனால்
என்னையா கூப்பிடப் போகின் றீர்கள்?
அப்பன் முருகனை அல்லவா நீங்கள்
அழைத்திருப் பீர்கள்! அழைத்திருப் பீர்கள்!
என்று பேசா திருந்தேன்” என்றந்த
ஏழை முருகன் இயம்பினான்! சாவிக்
கொத்தை ஆவியாய்க் கொண்ட
முத்தையா பிள்ளையின் முகம்இருண் டதுவே!

நூற் பெயர் : மீரா கவிதைகள்
வெளியீடு  : அகரம், மனை எண் 1,
                         நிர்மலா நகர், தஞ்சாவூர்-7.
விலை      :  ரூ. 60 /-

 கிருஷ்ண ஜெயந்தி, காந்தி ஜெயந்தி போல் கவிஞர்களுக்கு இன்று மீரா ஜெயந்தி! ஆம்... அக்டோபர் 10 - மீரா என்றழைக்கப்படும் சிவகங்கை கவிஞர், பதிப்பாளர் மீ.ராஜேந்திரன் அவர்களின் பிறந்த நாளுக்கான(10.10.1938)
அர்ப்பணிப்பாக வெளியிடும் பதிவாய் இதைக் கொள்ளலாம்.

அவருக்கான வலைப்பூவிற்கு செல்ல-மீரா