பறத்தல் - பறத்தல் நிமித்தம்

ஆமாம்.
எனக்கு வயதாகி விட்டது-
அதனாலென்ன...?!

எட்டும் தொலைவில் வடுமாங்காயென்றால்
எட்டிப் பறித்துத் தின்கிறேன் இப்போதும்

பேரன் சுவைக்கும் குச்சி மிட்டாயில்
காக்காய் கடி தந்தால் மறுப்பதில்லை

பலூன் ஊத ஆசை வந்தால்
பாலிதீன் பையையும் ஊதி வெடிக்கிறேன்

நேரமிருந்தால் குழந்தைகளோடு
ஒளிந்து விளையாடுவதில் உற்சாகமெனக்கு

பேருந்தில் சன்னலோர இருக்கையென்றால்
கும்மாளம்தான் மனசில்
குளிப்பாட்டி சாதம் ஊட்ட நீங்க வந்தா
குளித்துச் சாப்பிட நானும் தயார்!

ஆடை சுமைதான்
தழுவிச் செல்லும் காற்றில்
நழுவிப் போகுது மனசு
சுருங்கிய தோலும் தளர்ந்த நடையும்
முதுமை அறிவிக்கும் முரசமா?

மாடு இளைத்தாலும் இளைக்காத கொம்பாய்
மனசிருக்கே குழந்தைமை நிறைந்து!